ومشّييلي على الجبين عصابة، من غير امان امان امان

اوّل نهار رمضان الحشيشة و لخلايق الفاسدة في العلالي كي العادة، والضو لحمر ازراڨ من كثرة ما  حرڨوه، و البونية تخيّط على الماء و اجواء حاسيلو، في الحقيقة هي اجواء العادة متاع شهرنا الفضيل شهر الصيام و العبادة و التقّرب للمولى.

و في اليل، في تونس ضبعة، حطوا الابتهالات و كذا و كذا و لكاميرا الخفيّة متاع رؤوف كوكة!!!!

ما نكذبش عليكم و احد امن لناس شككوني في روحي، و كان ماجيتش نعرف روحي مليح راني قلت صائم، ثبت مليح نلقاه رؤوف كوكة بطمه و طميمه ، بالشلغومات و التكشيخة التاريخيّة تڨول كان محنّط، ونفس التفدليكات الّي لمزمرا فيهم تعمل جلطة في المخ، حاسيلوا ناقصها كان اشهارات فانطازيا و ويكاند لايت و فريك فريك ماله شريك و بالي سهام بلخوجة و نجبيب الخطّاب و ما رضاء لله الاّ برضاء الوالدين و نرجعوا كاينا في عام 90، شي ما تبدّل، اون بليس اللغة الخشبيّة تطورت و ولاّت قصديريّة.

واحد من الناّس تالمون حزني و المي طلعوا كبيران كان مش الشهر الفضيل راني دورتها لبار من البيران فمّاش ما نبرد من ها الغلبة.

بربي قولولي علاش احنا شعب يعيش خارج سياق التاريخ؟ شعوب تخزر القدّام و ديما انافا انافا واحنا عملنا حضارة تسخين البايت حتى كانو ڨارص و اجبد من الارشيف حّى كاني غبرته تغطّي ستاد.

هو برجوليّة، النية مبيتة من الاول، و باينة. باينة من وقت اليّ الي حطولنا وزير اول موجود في موسوعة ڨينيس كاخر تونسي مازال على قيد الحياة خلط على الملعب التونسي شهرت البقلاوة كي هزت البطولة.

النية واضحة، معناها نحمدو ربيّ كي ما حطولناش توجيهات الرئيس بعد اخبار الثمانينة.

هو معروف انه المشرفيين على التلفزة اللوطانية يعانيو من ارتفاع حاد للمادّة المسببة للتصتيكة البڨري في دمهم و كان جاو البوليسيّة يخدموا في خدمتهم راهم في كل مرّة يسوقوا فيها كرهبة يفكولهم البرمي بتهمة سياقة في حالة بهامة و كل مرة يخرجوا فيها للشارع يوقفوهم بتهمة بهامة واضحة في الطريق العام.

اما مع ها المرض المزمن هاذايا، عندهم مرض عضال واحد اوخر، الا وهو انه عفانا و عفاكم لله، عقارب منڨالتهم ما تقدمش كيف ما خلق ربي لكل،

معناها يا سيدي الي منڨالتهم توقفت بيها عجلة الزمن، ما تڨمدمش و ما ترا العالم كان عملنا بالنظريّة الانشتاينيّة متاع "لعزوزة اذا خرفت تتذكّر نهار عرسها" و يا حسرة على الزمن الجميل وقتلّي كان التلميذ كي يعرض معلمه في الشارع يهرب يجري و خنانته هابطة

ناس غير قادرة انه تخزر لقدّام و انها تتصور المستقبل و ما ترى حياتها كان في لماضي  وحتى كانو مزڨدح ملڨدح يولّي اموره ويكيلكس و يا حسرة كيف كنت و كنّا و كان لعڨل بيك والع.

ووكأنه حكاية رؤوف كوكة ما كفاتش، يلعجوا علينا لخوة و لخوات على الخواء بتصاور حبيب الامة زوز ميترو لاسطيك و كمّل الباقي وحدك، تصاور بورڨيبة بمناسبة قالّك شنوّا ليوما عيد ميلاده.

برّا لله يهلكك يا عزوزة، خرفت و مت و خليّت الشعب يحلم بنهار عرسه و حتّى كان ما عرسش تلقاه يحلم بعرس بوه.

خاطر و قتلّي  تفيق من النوم تلقى تصاور بوڨيبة عاطية مسدة، اعرف الّي انت في بلد الامن و الامان.

شعب غير قادر على تصور المستقبل كان في شكل اعادة مأساويّة كاريكاتوريّة للماضي ما لازموش يستغرب وقتلّي يهان و ووقتلّي يركب على ثورته اللاّبس و العريان 

و مشّلي على الجبين عصابة، من غير امان امان

سامي التليلي
اوت 2011