سامحونا راهم غلطونا
سامحونا كان اتهمناكم بالباطل
، لواحد من الفرحة كان زاطل
، يحساب من جرتكم كان عاطل
ونتوما خاطيكم
، عمرها ما عملت يديكم،
لا نهار ضربت
لا نهار سرقت
لا عمرها دلست
و لا ميزانيّة فّلست
سامحونا راهم غلطونا
صغار و بعولونا
ڨالو لينا راكم هنتونا
ايامات عمرنا سرقتولنا
احلامنا فسدتولنا
و عرڨ جدودنا مصيتولنا
سامحونا راهم غلطونا
صغار طايشين و بربشونا
ثرنا علّي قرّونا
و كبرّونا
ورعونا
المذلّة سڨونا
السكات علمونا
على الكذب وصّونا
بطّالة ردّونا
و لمبادوزا وصلونا
سامحونا كان ثرنا في ڨفصة
و سبّيينا نظامكم العفسة
صغار و ما يدروش
مش صحيح الّي كسرة ما لڨوش
ذر طمّاعة يحب على البناويت و الفاشوش
سامحونا كان ثرنا في بوزيد
لواحد ما كانش لربه حميد
كرشه ڨدّّامه ماشية و تزيد
و هو متغشش يحب على الشيخات و التفرهيد
سامحونا كان ثرنا في تالة
و الخير مطيش بالبالة
و ما تحكيش على الڨصرين
ويلعن بو الديمقراطيّة
و ام الشفافيّة
و دين ام القضاء المستقل
راهم غلطونا
نحبّوا لڨبل ترجّعونا
نحّبوا نظام لا يبلّ و لا يعل
بركه اخطونا
و بجاه الي ماتوا سامحونا
و كان الشهيد خلّى وصيّة
ڨولوله انّما الاعمال بالنيّة
ارڨد و اطمان
هاك بحذا الرحمان
ابكي على ڨعد في الارض
هانه لتواّ جيعان
سامي التليلي
اوت 2011
Aucun commentaire:
Enregistrer un commentaire