و على الثورة المحنونة الّي بيها مرجونا
ثورة الياسمين الّي ذبلت في رمشة عين
لا الاه الا لله والفرح واتانا
يا سعد من جانا و هنّانا
الثورة هاذيا
امورها منطقيّة
كيما بداها الشعب
ڨتلتها البورجوازيّة
وباسم المصلحة القوميّة
و الحسابات الاقتصاديّة
اللّي ما تفهمش فيها الرعيّة
جبدوا بينا الزربيّة
ونصبوا علينا حكومة البلديّة
و ياقوم اسكتوا علياّ
هاذا شقالت لنا حكومة تصريف المياه
دبرّوا على دين والديا
كمّل عطس علينا الشاه
لا الاه الا لله والفرح واتانا
يا سعد من جانا و هنّانا
يا عزيز عليّا ايجا نڨلّك برجوليّة
الشي مش متاعنا
هاك ترا في الهمجيّة
الّي ليك ليك و الّي خاطيك خاطيك
الشعب يلوّج على رزق البيليك
و زيد ڨطّعوا عليه البوليسيّة
و ختموها الفاناتيك
و لا نفع فيها لا تكبير و لا تكتيك
ثورتنا طلعت ناقصة فيزيك
سحابة صيف كيف شطحة التكتونيك
لا الاه الا لله والفرح واتانا
يا سعد من جانا و هنّانا
لا سيما الشعوب الامميّة
الي جدت عليها كذبتنا
و زادوا كملوا على علّتنا
ڨوللهم راهي حكايتكم مرجتنا
اياّّ صلّوا على النّبي و يزّي بلا فتنة
اخطوا لمعمّر وسامحوا مبارك
و ما تغلطوش مع البعث و بشّار
و يزّوا بلا تفوريخ و معارك
و سامحونا شعبنا المسكين
الّي بتلبيزه في محنتكم شارك
لا الاه الا لله والفرح واتانا
يا سعد من جانا و هنّانا
لثورة الكرامة ڨول طريڨ السلامة
و خاطري متهنّي
و ياشعب سڨّيك الزوز حنّي
لا تؤخذ الثورة بالعياط و الفوضى
و انّما تجي بالرڨاد و التمنّي
وتلمّت لحباب خرجت لكلها نظيفة
و يحيا الطيّاب
يا ماحلى ها الثورة
لشعب لمسّخ
و لحكومة شريفة
خمسة و خميس
على حكومة البوتلّيس
سامي التليلي
اوت 2011
Aucun commentaire:
Enregistrer un commentaire