تونس الخضراء، تونس دمّارستان، و محمّد البوعزيزي

هي بلاد خضراء في تراب مشهور

في الزمان ڨديمة ڨدم عهد الديناصور

و في القدر عظيمة،

 ترابها جاب اكثر من علاّمة وقور

تڨلبت عليها الدنيا و بركت الأمور

و دار عليها الزمان الخوّان

و خلّى هالشعب يعيش محڨور

ملّي كان مشهور و يحكيو عليه في جميع لبرور

و طفح الكيل و جفا الخيل

و ولاّت نهاراتنا لكل ليل

و بردت لڨلوب و ڨالوا علينا داعين 

لازم عملنا عملة مرّة

 كي عملت اصحاب الفيل

ما عادش تتقوملنا قائمة،

 راهم الربوبة علينا غاضبين

لا تقوملنا قائمة و كان تجيبوا علاء الدين

و معاه القنديل

و ما بين ناس عصات و ناس رضات بالموجود

بين ناس سامحت و ناس لحمها امر من لحم الڨنفود

قعد شعبي حاير، رافع شكواه للمعبود

فمّاشي ما يسامحه

 وينحّي عليه لعنة السبعة رڨود

 و وقتلّي جميع لبرور حسبت شعبي دايخ هادتته لهدود

خدّم شعبي الموتور

و حلف بيمينه لا عاد يعيشها مقهور

شعبي و قف و بكل حزم طرّد انذل دكتاتور

شعبي مسالم، صمد ، ناضل و قاوم

و لا استحق لا لكلاشنكوف و لا لنابالم

طرّد بالكف امسخ دكتاتور

و حكاو علينا من غمبيا لكوالالمبور

على المعجزة التونسيّة

الحقيقيّة

مش معجزة 'الف، م، ي*''و صناديق النهب الدوليّة 

شعبي شد صحيح و قال بعمري لا نسامح كلاب الدكتاتور

شعبي قاوم و و صمد و بكل حزم حل حزب الدستور

و يحكيو يا سادة يا مادة يدلنا و يدلكم على طريق الشّهادة

كان يا ما كان مش بعيد برشة في الزّمان

على ارض خضراء كانوا يسمّوها بر الخضراء

بلاها ربّي بعڨربان و اسمه حزب الدستور

اوّل ما عمل قسّم البلاد، اولاد بلاد و جبور

ناس شايخة و ناس دايخة

ناس عندها جهود تنمويّة و انجازات اقتصاديّة

و ناس عندها ..... الشَّبْ

هاذا بالطبيعة من البرّة

و يامزيّن من برّة اش احوال خرمك من داخل

من داخل لكلها كلاتها المحقرانيّة

لكلها تقطع عليها النفس و تصيح بالسكات

تلوّج على نسيمة حريّة

حزب الدستور ضرب راس براس

لين خيّخ الساس

و قسّم البلاد؛ الشمال زوز انواع :شرقي و غربي، و الجنوب زوز انواع و الوسط  5 انواع

و حكايات حاسيلو تشعرك في نفس الوقت بالضحك و القرف و السخريّة

على بلاد ما تجيشي نهج في جمهوريّة الصّين الشعبيّة

و ما احلاها النعرة القبليّة و الفتن الجهويّة

كي تنسّي النّاس اصل المحقرانيّة

 ما احلاها النعرة القبليّة و الفتن الجهويّة

برعاية الوجوه الفكريّة و الثقافيّة

متاع القناة الحنّبعليّة و اختها الكبيرة البنفسجيّة

و الخطابات اللّوحيّة في البرامج الثقافوـسياسيّوـاقتصاديّوـرياضيّو خرمولوجيّة

متاع الڨنزوعي و بن غربيّة

محمّد البوعزيزي من ها الجماعة الّي يڨولولهم جبور

كيف الألاف من انداده قرأ و كبر

كتب و كبر و حلم بروحه عايش بقدر و عزّ

و حر كيفما العصفور

اما يا حمّة، كيفاش تحب تكون عصفور

و قتلّي بلادك بلاها  ربّي بحاجة اسمها حزب الدستور

و العيشة تحت حكم حزب الدستور 4 انواع

 ـ تڨول لا و تعيش مقهور

ـ تبيع ذمّتك و تولّي مأجور

ـ لا واعي، سكرة زطلة و حرابش تحت السّور

ـ ولاّ حرقة و عبور البحور في بابور

هذا هو حزب الدستور، الحزب التراكتور

حزب عريق، اساليبه من عهد الفينيق

حزب من زمان اخر، من زمان الديناصور

حزب ال99% وشعاره: يا تحرق يا نحرقوك

يا معايا، يا تبلّع، و كان تتكلّم نحّيولك جد بوك

محمد رفض يعيش مقهور و رفض يحرق في بابور

محمّد قرا و سهر اللّيالي و امه ضحّات بالغالي

وخوذ البسيسة و التّمر يا مضنوني و الفين عشرينات توّا جوني"

خوذ الصّوارد خوذ غير دير الّي في بالك، العلم يا مضنوني ما يطيحك في مهالك"**

هزيتهم يامّة، هزّيتهم و قريت و هزّيت شهايد ماهي شهايد

اما اولاد الحرام ما خلّوني، من صغري سرقوني و من احلامي حرموني

اولاد لحرام يامّة، النّاس الظلّلام يا دادة

في بلادي هانوني، فيها غريب عيشوني،

حكموا عليّا نعيش دوني،

مصّولي عرڨي، دم ڨلبي سلبوني و جهامة بلا روح خلّوني

و حرق محمّد روحه

حرق و قال: لا ما نحرقش، هنا عشت و هنا نموت

لا ما تحرقونيش و لا ما تحرقوش لبلاد

بلادي غالية و قدرها عالي،

نموت و لا يحرقوها كمشة فسّاد

محمّد مات و معاه قصّة حزب الدستور وفات

محمّد مات و قال يا حزب الدستور اللّعبة انتهات

انا مت يا شعبي،اما عطيتك صفحة جديدة

انا مت يا شعبي،اما عطيتك صفحة جديدة

فيها تكتب احلى حكايات

انا مت يا شعبي ، اما عطيتك صفحة جديدة

صفحة الحياة

بيدك انت يا شعبي، تخلّي الّي جاي احلى من الّي فات

كيفما بيدك انت زادة، ترجّعنا للبدايات

لزمان الحيونات،

زمان ما قبل الڨوفرات

يا تونس ليك الحريّة، لا دساترة و لا رجعيّة

يا تونس نحلم بيك شعبيّة، تفسّخلي من قاموسك كلمة نزوح و براينيّة

مالبرّاني كان الشّيطان يا تونس،

و الشّواطن ماو هم في السّعوديّة

يا تونس نحلم بيك لِيّا، و نحلم بيها ليك

و نحلم بيك ليها، و نحلم بيك لينا و لينا انا نحلم بيك

                                              *F.M.I

                                                **مقطف من قصيدة "البسيسة'' لبلڨاسم اليعڨوبي

 فيفري 2011