اضرب بالماء فرق

  

اضرب بالماء فرق

و زيد اضرب بالسلاسل

اضرب  بالماء فرق

و زيد اضرب بالسلاسل

و استبله المواطن الغافل

و اهرب للخارج منها هجّة

 و منها حجّة ترجّعك بعد سنين طاهر

نظيف عفيف لا ذنب عليك

اضرب بالماء فرق

و زيد اضرب بالسلاسل

و كي ترجع يجيوك النّاس ڨوافل ڨوافل

اضربني واضربها واضربه و اضربهم بالماء فرق

و ارجعلنا بطل

وخلّينا بغبننا نتهزوا و نتحطّوا

بالعِرق بالعِرق

اضربنا بالماء فرق و بالبيران لحديد

ما كذبش الّي سمّاك سوسة صديد

تهروش و تاكل من كل شيرة

طاعون على حاله هازه فار بوطميرة

اضرب بالماء فرق و اهجم على النساء بساطور

يا فرنكشتاين حزب الدستور

خلقوك باش تكسّر كل حاجة يشمّوا عليها ريحة التقدميّة

الّي تهدّد عرش امبراطور الدّولة البورقيبيّة

خلقوك و حاروا فيك

سلّحوك و وحلوا فيك

اضرب بالماء فرق و  زيد معاه شاڨور

وجيب حتّى  صاروخ ستنڨر اضرب بيه وليّ الأمور

صحيح انت حاربت وليّ الأمور

اما ما حاربتوش خاطره ديكتاتور

حكم بالحديد و النّار

و لا نهار استعرف بقانون و لا بدستور

حاربته خاطرك انت زاده تحبّ تولّي امبراطور

انت زاده لا تستعرف لا بقانون و لا بدستور

الهمّ هو هو، الغمّ هو بيده ولو تبدّلت الڨشور

اضرب بالماء فرق احرار الدّار

و ارجع بعد سنين بش تعمل احسن افار

و عمّل على دعاية قنوات النّفطي ابو لحيان

باش يرقّعلك ليمان*

راهي شطارة البتروـدولار ما كيفها شطارة

في ترقيع غشاء البكارة

و ترويج ثقافة الحرمة و سي السيّد و باب الحارة

و ترجيعك انظف انسان

روّح و عليك الأمان

نطلعوك على الأكتاف كيف لمبراطور

و نعملوا الشعب تراكتور نركبوله على ثورة الأحرار

كيف حرق البوعزيزي روحه

قلتوا هذا كفر و حرام

خروج على الشّرع و على سنّة الكرام

هذه زندقة و قتل نفس بغير وجه حق

لا يحقّلكم حق تحبّوا تدخلونا في نفق

كيف كانوالأحرار في السّاحات ولاد و بنات

باليد العريانة و السّاق الحفيانة عاملين ضدّ الكرتوش جدار

كنتو متخبّين في الدّيار تستنّوا في الثّمرة تطيب

باش هناني بناني تقطفوا الثّمار

طابت الغلّة و خرج الفار من الغار

و جا يتڨزدر كي الفارس المغوار

و تالة و باجة و بوزيد و بوزيّان و الحاجب و القصرين و تونس و الوردانين

لا تركبوها على ثورة الأحرار

تنسى الدّنيا، تنساو الكل اما انا ما ننساش

ما ننساش سنين عمري الّي في جرّتكم عشتها خفّاش

عيشتوني في الظّلام يا طيور الظّلام

و النّهار لحيط لحيط خايف لا يشدني جيشكم الحشّاش

تنسى الدّنيا، تنساو الكل اما انا ما ننساش

انا شكون؟

انا التّونسي الحر من برّ الخضراء والذل انا ما نطييڨاش

انا التّونسي الحر من برّ الخضراء و عبوديتك انا ما نرضخلهاش

تتلوّن كي ام البويا، تعمل ليوم غزالة وغدوة بو كشّاش

اما الّي في الڨلب في الڨلب،و النّزاهة راك ما تعرفهاش

انا التّونسي الحر من برّ الخضراء والذل انا ما نطييڨاش

انا التّونسي الحر من برّ الخضراء، نموت حر

و فاشيتك انا راني ما  ما نرضخلهاش

*l'hymen                       

                                    جانفي  2011