على بلاد في المساحة صغيرة و في الشان كبيرة
طفح بيها الكيل، تغششت وغضبت،زمهرت و زغدرت، خاظت و هاظت و خلاّت البايات في حيرة
والبايات برعيّتها خبيرة، تعرف الّي الصغيرة كان ثارت تتهزها للحنديرة
دوب ما فاح الخبر فزعت البايات و خرّجت كلابها من كل شيرة
على بلاد في المساحة صغيرة و في الشان كبيرة و تبدا بحرف الراء
على بلاد صغيرة و في الشان كبيرة، اسمها فيه حرف الدّال ،
بلاد من جوفها ، من الداخل غنيّة تغلي بالخيرات
و من الفوق فقيرة،. راكم تقولوا ملاّ حكاية تعمل الحيرة
فقيرة ولاّ فقّروها، فقيرة ولاّ حكموا عليها تكون فقيرة
هاذي حكاية كبيرة، من مسلسل الف حيلة و حيلة
في القرن الّي فات، جا القاوري بو برطلّة
حطّ وذنه على قلب البلاد، طبطب و قال: هاذي ارض معبيّة بالثروات
ابشروا يا ناس، جاتكم الخيرات
انسوا الفلاحة البعلي، و المطر الّي ليوم صبّت و البارح ما جات
و ايديكم على قلوبكم: زعمة السّنا الصّابة مقدودة ولاّ كيف العادة عجرودة؟
طيّش المسحة و المحراث و برّا لوّج على الفسفاط
مشى بو برطلّة و جا بو كبّوس
مشى بو برطلّة و جا بو كبّوس، و باقي هي هي ... العلّة
لا رينا لا خيرات لا ثروات، ما رينا كان الز لاّط
ياخي اش جاب بوكبّوس لبو برطلّة؟، لاهم من نفس البلاد لا من نفس الملّة
اش جاب بوكبّوس لبو برطلّة؟
الفلوس
يالّي خارج من قفصة و شادد ثنيّة الجريد
هزّ راسك لفوق و سلّم على هاكل البلاد الصغيرة صاحبة الشان الكبيرة الّي اسمها يوفى بحرف الفاء
سلّم على اولاد بو يحي و اولاد بوعبيد
نساء احرار و رجال صناديد
واجهوا النّار و الحديد بالصّدر العريان
سلّم على عدنان و بشير و مظفّر و حسن و الفاهم و
بوبّكّر و الطيّب و هشام و الحفناوي، مغزاوي ولاّ بن عثمان
و كل من اعلن العصيان و كذّب كل من تهنّى واطمان
تهنّى واطمان و قال ما عندكم ما تستنّوا من شعب جبان
كمشة جبورة ما يهمّهم كان في الكورة
لا يحسّوا على الخبزة و لا نهار اتشكّوا من غلاء الفاتورة
في الرديّف خرج الشّعب و عارف الّي ما عليه حتّى امان
و خيّط الكرطوش، خيّط يا كرطوش، انت تخيّط و انا نعيّط
انت خيّط وا نا نعيّط و خلّي العالم يشهد من هو منّا الجبان
خيّط يا كرطوش، الرّب واحد و الموت واحدة
ايه عادة خنموت وانا حرّ، قلّي: ياخي من هو يتّحمل الطغيان؟
تَيَغْلََى على بلادي نعطيها روحي قربان؟
و اشهد يا عالم، اشهد يا عالم علينا و على الرديّف
اشهد على انهيار اسطورة الاعجاز المزيّف
و الحلم المزيّف و السّلم المزيّف و الامن المزيّف و الخيرالمزيّف
اشهد يا عالم علينا و على الرديّف
اشهد على الجرح الّي جيّف من الصّحافة الّي تعيّف و السّكوت الّي يعيّف
و الكذب الّي يعيّف و النّفاق الّي يعيّف و البورجوازيّة الّي من دم الشعب تتكيّف
على بلاد صغيرة موجودة في برّ صغير، و في التّاريخ كبير
برّ كانوا يقولوا له برّ الخضراء
الخضراء هاذي بنية شبابة، طويلة و قمحيّة
خطبوها ناس من كل مكان، بربر و فينيق ، عرب و عجم، رومان و بني عثمان
الخضراء زينها ما كيفاش، لعينين بنزرت و القلب القيروان ،
إلخضراء اذبالت، مر ضت و اصفارت
و مالّي كانوا يقولولها الخضراء، و لّوا يقولولها دمّار ستان
دمّارستان بلاد عجيبة غريبة
دمّارستان لبلاد الوحيدة في الدنيا الي تعتبر الجيعان خوّان
الّي تعتبر الّي صاح و قال يا ناس، يا بشر راني كرهت حاجة اسمها حرمان
راني جيعان في معدتي، جيعان في مخّي و راني للحريّة عطشان
اي نعم انت خوّان، و يمّا يا غاليّة و ما نحسبك ... خوّان
ياخي منهو الّي خان، الّي قال لا للذل؟ الي هزّ راسه و قال
نموت حر و لا نعيش مهان، باسمك، بشرفك يآآآآآا بني الإنسان
ولاّ الّي فرعن و تجبّر و حكم علينا نهجّوا ولاّ نحلموا بالهجّة لبرّ الرّوامة و الطليان
و هجّينا بالبدن ولاّ بالمخ، و قعد وحده، قعد وحده ينشّ في الذبان،.... برّ الأمن و الأمان
من فوق عرباطة، وقف بن سديرة، و معاه الدغباجي
و خلطوا على الجرّة خمسة، الحامي و حشّاد وبن غذاهم و الشرايطي و الجربوع
وكل منهو صاحب عملة مرّة
من فوق الجبل خزر الدغباجي للرديّف و شاف، شاف بعينيه ملك الموت يراجي
امّا ملك الموت هذا الدغباجي ما عرفاش
ما هوش جدارمي فرنساوي ولا طلياني ولاهو لابس كمبة العكري ولاهو اشقر
هذا ملك موت اسمر وعيونه سود، اش امجيبه لبيّاش؟
و علاش اولاد الخضراء مسيبين عليهم ها الأوباش؟
وقف مصباح الجربوع، و قا ل قدّاكش كبيرة يا قفصة
قدّاكش كبيرة يا قفصة طول عمرك للكرامة ينبوع
قفصة بنت تونس، بنت تونس الولاّدة
تونس الولاّدة مش تونس القوادة والفكر المبيوع
حتى كان خمد صوتنا، و صوّرولنا في كل بلاصة كلمة ممنوع
بالطّينة هاذي من نسانى و رجالنا راسنا ديما مرفوع
ارفع راسك ارفع راسك خلّي عهد الذلّ يولّي
ارفع راسك، راهي الرديف في بلادك
و اكتب، اكتب يا تاريخ و خلّد ملحمة العصيان
و دوّنها، دوّنها و سجّلها يا تاريخ
و حتّى كان من كتبك نحّوهالك
ذاكرة ارض الخضراء تحفظهالك
ديسمبر 2010
كتبت هذه الاسطر تخليدا لملحمة الحوض المنجمي التي وقعت سنة 2008
RépondreSupprimer