حول العلاقة بين البيرّة و الدّولة في الجمهوريّة المستقبليّة

بيان تحالف 23 مكرّر نهج 17 حول العلاقة بين البيرّة و الدّولة في الجمهوريّة المستقبليّة


تنبيه: لتسهيل الفهم و سهولة الهضم يرجى قرائة هذا البيان مع الإستماع لرائعة الشّاب صاليح "البيرّة عربيّة و الويسكي قاوري يمّا يمّا يمّا"


إنّ تحالف  23 مكرّر نهج 17 و في إطار اعداد تصوّراته و برامجه للجمهوريّة  
 المستقبليّة، و بعد مناقشات و محادثات مطوّلة، يصدر البيان التّالي : 
ماناش نحضّروا في الحصيرة قبل الجامع ، اما هاذا دليل للّي قال ديما تحكيو و عمركم ما عملتوا شيّ نافع
تلمّينا و احكينا و تناقشنا و على ضوء ما حدث سابقا  من نقاشات بيزنطيّة مابين انصار الافكار القروسطيّة و دعاة الواقعيّة السّياسيّة
  
اتّفقنا و قلنا: هاو كيفاش باش تكون العلاقة ما بين الدّولة و البيرّة:
أوّلا: إيلاء البيرّة ''فلسيا'' مكانة خاصّة باعتبارها البيرّة الرسميّة لأغلب المواطنين.
ثانيا: إدانة بدعة اعتبار البيرّة شأن شخصي لا علاقة له بالسّياسة و لا بمشروعيّة النّظام.
 ذلك ان جماعة الحداثة تيهزّونا للكارثة، راهم يحبّونا نمرّوا للتطوّر بسرعة نفٌاثة دون مراعاة للمشا عر البيريّة لشعبنا العزيز
ثالثا: ادانة السّياسة اللّّيبيراليّة للحكومة السّا بقةالّتي شرعت في الأونة الاخيرة في تطبيق مخطط "التعدّديّة البيريّة".
ان التعدّديّة البيريّة المتمثلة في دخول الماركات الأجنبيّة ''هندي كان''، "صديد براو" و "عفستال'' للسّوق المحليّة  تشكّل خطرا حقيقيّا  على هويّة شعبنا ''البوخوـماقونيّة
فالمواطن الّذي كبر و نشأ على فكرة الحزب الواحد و الحب الواحد و الفكرة الواحدة و لعلّكم تتذكرون  النّجاح السّاحق للمسلسل المكسيكي ''انت اولا احد"، هذا المواطن ستصيبه هذه التّعدديّة البيريّة و هذا الإنفتاح المفاجئ بحيرة ميتافيزقيّة و ازمة وجوديّة لا تحمد عقباها.
ثم و لماذا عقدة الأجنبي هذه الّتي تلازمنا، يا اخي لماذا نأتي ببيرّات من وراء البحار و الحال انّ بيرّتنا الوطنيّة جعة ممتازة و تفي بالغرض، كفانا يا أخي كفانا من عقدة النّقص.
انّ هذه السّياسة اللّيبيراليّة الوحشيّة المترامية في احضان الغرب الكافر من شأنها ان تصيب المواطن بأزمة حادّة للهويّة و ذلك ان من تداعياتها الغربة الثقافيّة و الأفكار 
الإنسلاخيّة 


و اخر الكلام تلقّوا منّا افضل عبارات الإحترام و لله يصون بلدنا و يحفظ السّلام و يبرّك النظام و ياشعبي يا غول رد بالك من بقايا الدكتاتور و حزبه التراكتورو لا تتلفّت للبروباقاندا المسمومة لقنوات البتروـدولور الي يحبّوا يرجعونا لزمان الديناصور

وانّما الأعمال بالنيّات

قبيلة وانا نتفرّج على ا لآخبار كيما كل شيخ تراب محترم، و بيما انّوا القناة الوطنيّة اعزّها الله مازالت في النومة السّابعة، و شعارها الجديد " سايسي علّيا سايسيني، واحدة  واحدة حسّنيني"، (حطّيت قناة الجزيرة، و هذا موضوع اخر تو نجيوه)، عادة من جملة ما قالوا، قالوا الّي  حركة النّهضة تنوي تقديم مطلب حزب.
و لله ما فهمت انا ، يا خي شنياّ هاذي ينوي، :يا خي شبيه هو رمضان باش ما يصح كان بالنيّة؟، ولاّ زعمة الأخوة رافعين شعار "امشي بالنيّة و ارقد في الثنيّة"؟
 يا ولله كاراكوز، بالله كان فمّا شكون على اتّصال بيهم ( و لو انّي نشك بصراحة) ماذي بيه يفسّرلهم الي هوما راهم يحبّوا يعملوا حزب سياسي مش حزب لطيف. خاطر على الدزّة هاذي من نفقته  باين عشاه.

خواطر من جرّة تدريع لخواطر 1

توضيح: هاذي راهي مشّي قصيدة، لسبب بسيط هو انه الي كتبها مش شاعر، لا عمودي و لا نثر و لا حر ( بربي منين جاتو الحريّة) يمكنشي شاعر بالوضع و شوف و شوف.

هذه اذن خَواطر هبطت من كثرة تدريع لخْواطر

كتبت هذه الاسطر يوم 31 ديسمبر 2010 في ظرفيّة خاصّة، احتفال الشعب التونسي براس العام على انغام الكرطوش الي يخيّط في بلاده

و انت غاطس في الميكول، تمشمش و تعاود في الدندون

فكر بغيرك، كم من مغبون مطيّش في سيلون

وانت غاطس في الشروبات، بيرّة و تفرهيد،

فكّر في شعيرها الي جاي من بوزيد

و انت ساهر في الحمامات، ويسكي و فودكا و شيخات

فكر بغيرك، لا تنسى من مات، ما بين الرديّف و بوزيد، و شكون يزيد

هام زادوا، مانا زعام في الزيادات

زادوا في الخبز، زادوا المازوط ، زادوا في البطّالة في الجواعة ، في، في، زادوا ساعة

وفت الزيادات، ما عاد فما ما يتزاد

انزادت الضحايا في بوزيان، منزل الحسين

،و المكناسي والرقاب و جلمة و جبنيانة  و فوسانة

و انت في الاحتفالات، ما فيها باس كان مع الشيخات تعمل وقفة تأمليّة

فكّر في غيرك هاكلّي سميتوهم مناطق داخليّة، نزوح، جبورة و براينيّة

ناسين الي ما فماش لا مناطق لا داخلية لا خارجية،

الي كّلنا كلاتنا المحقرانيّة، مضروبين بعصاة الذل

و نحلموا بنهار يسمعونا و يجاوبونا من غير حلول امنيّة

من غير ضرب و لا همجيّة، و لا لغة خشبيّة

نحلموا نحّسوا و لو نهار الي احنا مواطنين مش رعيْة

وانت تخمم تفكر  تكتب ولّا تغنّي و كل ما يسمى بفّنان

دازز فيها مهموم و غايضك حال الانسان

تغنّيلوا و انت حفيان، و تهدي اغانيك و قصايدك لشعب كوالالمبور الجيعان

فكّر بغيرك، الي ما بينك و بينه كان زوز محطات كيران

لاعب فيها ثوريّة ، ما نشوفوها كان في لومور الخارجيّة

تفّصل وتخيّط و تفرز ناسي الي الانسان واحد و حقوقه واحدة

تتباع صبّة موش بالتفصيل يا تهز لكل يا هز يدك مالطبق لا تتحرق

باش تتنتصر لقضايا الانسان، من غير ما تمشي حتّى لقندهار

ما تصح الصدقة كان ما يشبعوا اّمالي الدّار

لذا ما فيها باس شويّة رجوليّة و نسوويّة،

باش ما يقولوش عليكم، هام جماعة الجناح الثوري

لوزارة الخارجيّة....

وانتَ عامل روحك مولى الدّار موش هوني

في الرخاء تونسي و في الشدّة جبّوني

فكّر و فكّر روحك و قوللها الي باش يجيك نهار

يجيك نهار انت و عمّار

وقتها لا ينفعك لا مانع و لا ستّار

خرّافة العصيان: حدّتّت قهرزاد قالت

                                              

على بلاد في المساحة صغيرة و في الشان كبيرة

طفح بيها الكيل، تغششت وغضبت،زمهرت و زغدرت، خاظت و هاظت و خلاّت البايات في حيرة

والبايات برعيّتها خبيرة، تعرف الّي الصغيرة كان ثارت تتهزها للحنديرة

دوب ما فاح الخبر فزعت البايات و خرّجت كلابها من كل شيرة

على بلاد في المساحة صغيرة و في الشان كبيرة و تبدا بحرف الراء

على بلاد صغيرة و في الشان كبيرة، اسمها فيه حرف الدّال ،

بلاد من جوفها ، من الداخل غنيّة تغلي بالخيرات

و من الفوق فقيرة،. راكم تقولوا ملاّ حكاية تعمل الحيرة

فقيرة ولاّ فقّروها، فقيرة ولاّ حكموا عليها تكون فقيرة

هاذي حكاية كبيرة، من مسلسل الف حيلة و حيلة

في القرن الّي فات، جا القاوري بو برطلّة

حطّ وذنه على قلب البلاد، طبطب و قال: هاذي ارض معبيّة بالثروات

ابشروا يا ناس، جاتكم الخيرات

انسوا الفلاحة البعلي، و المطر الّي ليوم صبّت و البارح ما جات

و ايديكم على قلوبكم: زعمة السّنا الصّابة مقدودة ولاّ كيف العادة عجرودة؟

طيّش المسحة و المحراث و برّا لوّج على الفسفاط

مشى بو برطلّة و جا بو كبّوس

مشى بو برطلّة و جا بو كبّوس، و باقي هي هي ... العلّة

لا رينا لا خيرات لا ثروات، ما رينا كان الز لاّط

ياخي اش جاب بوكبّوس لبو برطلّة؟، لاهم من نفس البلاد لا من نفس الملّة

اش جاب بوكبّوس لبو برطلّة؟

الفلوس

يالّي خارج من قفصة و شادد ثنيّة الجريد

هزّ راسك لفوق و سلّم على هاكل البلاد الصغيرة صاحبة الشان الكبيرة الّي اسمها يوفى بحرف الفاء

سلّم على اولاد بو يحي و اولاد بوعبيد

نساء احرار و رجال صناديد

واجهوا النّار و الحديد بالصّدر العريان

سلّم على عدنان و بشير و مظفّر و حسن و الفاهم و

 بوبّكّر و الطيّب و هشام و الحفناوي، مغزاوي ولاّ بن عثمان

و كل من اعلن العصيان و كذّب كل من تهنّى واطمان

 تهنّى واطمان و قال ما عندكم ما تستنّوا من شعب جبان

كمشة جبورة ما يهمّهم كان في الكورة

لا يحسّوا على الخبزة و لا نهار اتشكّوا من غلاء الفاتورة

في الرديّف خرج الشّعب و عارف الّي ما عليه حتّى امان

و خيّط الكرطوش، خيّط يا كرطوش، انت تخيّط و انا نعيّط

انت خيّط وا نا  نعيّط و خلّي العالم يشهد من هو منّا الجبان

 خيّط يا كرطوش، الرّب واحد و الموت واحدة

ايه عادة خنموت وانا حرّ، قلّي: ياخي من هو يتّحمل الطغيان؟

تَيَغْلََى على بلادي نعطيها روحي قربان؟

و اشهد يا عالم، اشهد يا عالم علينا و على الرديّف

اشهد على انهيار اسطورة الاعجاز المزيّف

و الحلم المزيّف و السّلم المزيّف و الامن المزيّف و الخيرالمزيّف

  اشهد يا عالم علينا و على الرديّف

اشهد على الجرح الّي جيّف من الصّحافة الّي تعيّف و السّكوت الّي يعيّف

و الكذب  الّي يعيّف و النّفاق  الّي يعيّف و البورجوازيّة الّي من دم الشعب تتكيّف

على بلاد صغيرة موجودة في برّ صغير، و في التّاريخ كبير

برّ كانوا يقولوا له برّ الخضراء

الخضراء هاذي بنية شبابة، طويلة و قمحيّة

خطبوها ناس من كل مكان، بربر و فينيق ، عرب و عجم، رومان و بني عثمان

الخضراء زينها ما كيفاش، لعينين بنزرت و القلب القيروان ،

إلخضراء اذبالت، مر ضت و اصفارت

و مالّي كانوا يقولولها الخضراء، و لّوا يقولولها دمّار ستان

دمّارستان بلاد عجيبة غريبة

دمّارستان لبلاد الوحيدة في الدنيا الي تعتبر الجيعان خوّان

الّي تعتبر الّي صاح و قال يا ناس، يا بشر راني كرهت حاجة اسمها حرمان

راني جيعان في معدتي، جيعان في مخّي و راني للحريّة عطشان

اي نعم انت خوّان، و يمّا يا غاليّة و ما نحسبك ... خوّان

ياخي منهو الّي خان، الّي قال لا للذل؟ الي هزّ راسه و قال

نموت حر و لا نعيش مهان، باسمك، بشرفك يآآآآآا بني الإنسان

ولاّ الّي فرعن و تجبّر و حكم علينا نهجّوا ولاّ نحلموا بالهجّة لبرّ الرّوامة و الطليان

و هجّينا بالبدن ولاّ بالمخ، و قعد وحده، قعد وحده ينشّ في الذبان،.... برّ الأمن و الأمان

من فوق عرباطة، وقف بن سديرة، و معاه الدغباجي

و خلطوا على الجرّة خمسة، الحامي و حشّاد وبن غذاهم و الشرايطي و الجربوع

وكل منهو صاحب عملة مرّة

من فوق الجبل خزر الدغباجي للرديّف  و شاف، شاف بعينيه ملك الموت يراجي

امّا ملك الموت هذا الدغباجي ما عرفاش

ما هوش جدارمي فرنساوي ولا طلياني ولاهو لابس كمبة العكري ولاهو اشقر

 هذا ملك موت اسمر وعيونه سود، اش امجيبه لبيّاش؟

و علاش اولاد الخضراء مسيبين عليهم ها الأوباش؟

وقف مصباح الجربوع، و قا ل قدّاكش كبيرة  يا قفصة

قدّاكش كبيرة  يا قفصة طول عمرك للكرامة ينبوع

قفصة بنت تونس، بنت تونس الولاّدة

تونس الولاّدة مش تونس القوادة والفكر المبيوع

حتى كان خمد صوتنا، و صوّرولنا في كل بلاصة كلمة ممنوع

بالطّينة هاذي من نسانى و رجالنا راسنا ديما مرفوع

ارفع راسك ارفع راسك  خلّي عهد الذلّ يولّي

ارفع راسك، راهي الرديف في بلادك

و اكتب، اكتب يا تاريخ و خلّد ملحمة العصيان

و دوّنها، دوّنها و سجّلها يا  تاريخ

و حتّى كان من كتبك نحّوهالك

ذاكرة ارض الخضراء تحفظهالك

         ديسمبر 2010