كلمات البوعزيزي الاخيرة
حرڨة
تولعها شرارة
على دم راح خسارة
حرڨة تشعّلها صوابع
فنت عمرها بين الستيلو و الورڨة
و رصّى بيها البر
في تركينة
تفتل في سيڨارو بالدرڨة
حرڨة
تستر العار
و تخلّيها في البدن امارة
وشم ازرڨ
متاع شعب شن الغارة
خرج يطلب في النسمة و المرڨة
يلملم في جراح عمر راح خسارة
رصّاتله يضمّد
بعود الاراك
و يمسح
بصبع الطهارة
و يڨلولها ثورة و ما عاد نصافيك
يا الغدّارة
حرڨة
على احزان ليّام
لعبت بيها الغدّارة
و على ذر هرب بيها فرس الاحلام
باتت تحلم بالكرامة
صبحت تتجرّع في كاس المرارة
و عليهم لا ملامة
حكايتهم من اولها باطلة
نووا و ما صلوّش الاستخارة
حرڨة
حرڨة و لا ملامة
على احلام طارت بيهم لحمامة
و على بلاد
سيبوها الذيوبة
باش يشدّوها الترّامة
حرڨة وراء حرڨة
و حرڨة تنسّي في حرڨة
و الكسرة باڨي شايحة
لا نهار تغمّست في مرڨة
و النسمة باقي لايحة
مش البخور اليّ تيردها فايحة
حرڨة
خلّطت الاحلام بالاوهام
و خلاتهم يتعاشو
...
بالسرڨة
سامي التليلي
نوفمبر 2011
